Tuisblad

Jan Gun is ‘n elektroniese bobbejaan- en roofdier verskrikker. Hy het homself bewys as so effektief vir roofdiere dat hy nou ook die Skaapwagter is. 
Jan Gun vervang die vorige Skaapwagter 1, 2 en 3 modelle. Diens en herstel van vorige modelle word steeds gedoen, en die roofdier afweermiddel spuitbotteltjies is steeds beskikbaar. 

Sien video:

KENMERKE:

  • SIGBAARHEID: Kan van ver gesien word, en vertoon realisties, veral wanneer jy sy klere gereeld verander. Kragtige skietlamp bied uitstaande sigbaarheid in die donker op lang afstande tot 30km. Roofdiere en voornemende diewe word afgeskrik, want dit lyk en klink of iemand besig is om in die nag te jag.
  • BEWEGING: Jan Gun maak gereeld ‘n draaibeweging, en die frekwensie van beweging is verstelbaar.
  • KLANK: Volume is verstelbaar. Kragtige weerbestande luidsprekers en ‘n kragtige klankversterker lewer suiwer en realistiese klank.
  • INTERAKTIEF: Jan Gun gaan outomaties in “COMBAT MODE” wanneer sy beams gebreek word, en stel jou in kennis met ‘n sms wanneer dit gebeur. (“HIER IS GROOT K#K JY MOET DADELIK KOM”)

VERSTELLINGS:

  • “STANDBY MODE” Jan Gun praat en beweeg en skiet met reëlmaat ongeveer elke 15 minute.
  • “ALERT MODE” Jan Gun is baie aktief, hy praat, skel, beweeg en skiet ongeveer elke 10 minute.
  • “COMBAT MODE”
    Indien beams gekoppel is: word geaktiveer wanneer beams gebreek word.
    Indien beams nie gekoppel is nie: word geaktifeer elke 5 minute.
    Beams kan tot 100 meter ver opgestel word in verskillende rigtings.

Die Proses

Die proses het kortliks onder andere behels:
Ek het my seun  John, wat baie kreatief is en goed kan teken, gevra om die gesig van n kwaai boer te teken. Ek het met geluk die regte beeldhouer in die Kaap opgespoor wat die kop en lyf kon maak.Ons moes toe eers ‘n liggaam wat in die regte “geweer” houding staan, laat 3D skandeer. Uit hierdie skandering is liggaamsdele met n 3D drukker gemaak. Hierdie liggaamsdele moes op n stewige manier aanmekaar gesit en weer uitmekaar gehaal kon word. Dit het baie fyn ingenieurs-tekeninge en vernuf behels.Die talentvolle en kreatiewe beeldhouer, Pieter du Plessis, het toe verskillende “moulds” gemaak vir elke liggaamsdeel. Elke liggaamsdeel van Jan word steeds kunstig met die hand en met die hulp van hierdie “moulds” uit glasvesel gemaak.  Jan se gesig, kompleet met frons, glasoe en snor is elke keer n kunswerk op sigself. Daar was verskeie metaal bokse ontwerp en gemaak as Jan se voetstuk voordat ons een gekry het wat reg is. Die meganisme wat Jan laat draai het ook deur baie ontwikkelingsfases gegaan voordat dit reg gewerk het. Die elektronika was ook ‘n enorme uitdaging. In die proses moes ondenkbaar baie uitdagings oorkom word, en dis te danke aan die elektroniese ingenieur Willem Boshoff dat ons lewe in die vorm van beweging en klank aan Jan kon gee. Die regte luidsprekers en klankversterker moes gevind word om Jan se stem en geweerskote oortuigend te laat klink. Jan se stem moes opgeneem word, dit was ook baie lagwekkend en het ‘n seer keel en hees stem tot gevolg gehad. Jan se “geweer ” moet gemaak word, en daar moes n geskikte jaglig vir sy  geweer gevind word. Met elke Jan wat gebou word, voel dit soms soos n moeilike geboorte wat plaasvind. Maar dis die moeite werd, want Jan Gun het van die begin af gewerk en is sonder weerga as dit kom by die weghou van bobbejane en roofdiere!  

Prys

Jan Gun se prys is R 31,000.00 plus BTW. Volledig met sonpaneel, slegs die beams en battery is ekstra.

Jan is sowat 1.8m hoog sonder die voetstuk boks en sy lyf is gemaak van sterk glasvesel so hy is ontwerp om baie jare te hou.

Jan se klank toerusting is kragtig met n 500w klankversterker en twee waterbestande Marine luidsprekers in sy lyf.

Een stel beams met drade kos R 2,000.00 plus BTW en kan tot 100m uit mekaar opgestel word. Jan Gun kan tot 4 stelle beams hanteer.

Ons vind die bobbejane bly weg so ver as wat hulle vir Jan Gun kan sien, so mens kan hom eers sonder die beams probeer.

Jan is maklik verskuifbaar en ons beveel aan dat sy posisie gereeld verander word, minstens een keer per week indien moontlik.

KLIENTE TERUGVOERING:

“Ons gebruik Jan Gun om ons gewasse teen bobbejane te beskerm op ‘n plaas in die berge in die Beaufort-wes distrik. Jan Gun is in posisie by die lusern lande wat nie te ver vanaf die kranse is waar die trop slaap nie. In die oggende vertrek hulle vroeg en gaan elders, sonder om die lusern te besoek vir ontbyt soos wat hulle altyd gedoen het.”
– Jonathan Taylor, Landmark Foundation.

“Al die bobbejane hol ‘n lyn!! Ons het al n paar mooi stories. Jan Gun doen regtig sy deel vandat ons hom ontvang het in Augustus 2020 en het ons van groot skade gespaar. Ons wil asb nog twee bestel want Jan kan nou nie oral wees nie!”
– Maryke van der Val, Barko Investments, Lydenburg, Mpumalanga.

“Jan Gun werk uitstekend! Ons gebruik hom om boorde appel en peerbome op die plaas te beskerm. Alle bobbejane is weg en bly op die langtermyn weg uit die omgewing terwyl Jan Gun daar staan.”
– Johan Fourie, GA & J Boerdery, Sunnyside plaas, Noll, Langkloof.

Oor ons

Jan Gun is uit nood gebore, tydends die droogte het die skade wat bobbejane aangerig het op ons plaas in die Roggeveld berge naby Calvinia al hoe erger geword. Die vrugteboord en groentetuin is gestroop en verniel. Hulle het het begin om by die stoor in te breek om by die mielies uit te kom. Hulle was byna daagliks in die hoenderhok om die hoenders se mielies en eiers te stroop, en nodeloos om te se dit het gepaard gegaan met groot konsternasie, ontsteltenis en baie vere wat waai tussen die arme hoenders.  Elke geleentheid wat ek kon, het ek op hulle geskiet met die geweer, en later as ek net uit die huis kom met my geweer, dan vat hulle dadelik die pad . Maar hulle bespied die werf soos skelms en sodra jy weg is, dan is hulle weer daar. En mens kan nie heeldag op die werf rondstaan met die geweer nie. Toe het ek raad gekry en begin dink daaraan om ‘n pratende, bewegende bobbejaanverskrikker met ‘n geweer te maak.
Toe die droogte op die ergste was, het die bobbejane begin om jong lammers te vang, te verskeur en te vreet. Dit het my ontsettend kwaad gemaak en genoodsaak om die bobbejaanverskrikker lewe te gee. Dit was ‘n uiters uitdagende  kreatiewe proses om vir Jan Gun te laat opstaan, maar dit was en is steeds nie sonder baie vermaaklike oomblikke nie. Die naam is geinspireer deur ‘n bekende boer van die Karoo met die bynaam Jan Gun, wat die bynaam  jare terug al gekry het omdat hy sy vuurwapen aan die sy dra soos ‘n boere cowboy.